2 ka wanted sa Zamboanga nasikop

CEBU, Philippines - Nasikop sa lungsod sa Argao ang ikaduha nga most wanted person sa Margosatubig, Zamboanga Del Sur nga halos napulo na ka tuig nga nagtagotago sa balaud sa duha ka kaso’ng pagpanglugos sa iya’ng 9-anyos nga anak.

Si Edelberto Manalo Sumampong, 52, nasikop sa kapolisan sa sitio Media, Poblacion, Argao human gialarma nga nanunggab sa iyang igsuon.

Matud ni Sr. Insp. Alejandro Batobalonos, hepe sa Argao Police, may warrant of arrest ang akusado niadtong Pebrero 21, 2005.

Nangangkon ang dinakpan nga 17 ka tuig siya nga sakop sa Moro National Liberation Front (MNLF) ug nagpabunyag sa Islam sa pangan nga Nazer.

Ang manghud nga si Dennis ang nitug-an sa kapolisan nga duna’y kaso ang iyang maguwang.

Samtang usa sab ka most wanted sa Aurora, Zamboanga Del Sur ang nasikop sa mga sakop sa Criminal Investigation and Detection Group-7 sa Eusibio Compound, Subangdaku, dakbayan sa Mandaue pasado alas 3 sa nakalabay nga hapon.

Kaso sa ilegal nga drugas ang giatubang sa akusado nga si Ramel Durangparang ug wala’y piyansa.

Ang CIDG-Province nga gipangulohan ni Chief Insp. Rene Kyamko una’ng nakadawat og impormasyon sa gitagoan sa akusado hinungdan nga sila nangayo og kopya sa warrant.

Si Durangparang nalista nga top 5 most wanted person sa lungsod sa Aurora, Zamboanga Del Sur. Ang duha ka dinakpan kuhaon sa kapolisan sa Zamboanga Del Sur aron paatubangon sa kaso. (BANAT NEWS)