Nasira namusil

CEBU, Philippines - Nalandig sa tambalanan ang usa ka 32-anyos nga gidudahang bugaw human kini gipusil sa lalaki giingong iyang nahimong kostumer kay nasuko nga “nasira” sa babaye nga gihatag sa biktima.

Ang pagpamusil nahitabo sa Pelaez Street, duol sa usa ka lodging house sa Barangay Kamagayan ning dakbayan sa Sugbo pasado alas 2 sa nakalabay nga kaadlawon.

Ang biktima naila nga si Antonio Banguiso, sidewalk vendor nga taga Tabunok dakbayan sa Talisay, samtang ang suspetsado naila nga si Cerwin Jagonos, 23, lumad nga taga dakbayan sa Butuan ug temporaryo nga nagpuyo sa Upper Calajoan lungsod sa Minglanilla.

Si Police Officer 1 Junrel Dublin nadestino isip beat patrol sa Parian Police maoy nakasikop sa suspetsado.

Si Dublin nga nahinabi sa Banat News miingon nga nag-roving siya sa maong lugar dihang iyang nakita ang komosyon ug kalit niyang nadungog ang usa ka buto sa gituohan niyang armas nga dunay silencer.

Sa pagduol ni Dublin, nakita niya nga nahagba na sa kalsada ang biktima samtang dunay lalaking mikaratil og dagan hinungdan nga iya kining gigukod ug nadakpan.

Nakuha gikan sa suspek ang usa ka bag nga  gisudlan sa dala niya nga armas nga dunay silencer.

Sa imbestigasyon sa kapulisan ni Jagonos  miingon nga kini gusto lang mobalos sa  nahitabo gumikan sa kalagot niya nga nakagamit kini og “high voltage lady” hinungdan nga nasira pipila ka adlaw na ang nakalabay.

Matud pa ni Dublin nga gisabot og balik sa suspetsado ang biktima nga mogamit og lain na pud nga babaye , matud pa gipangayoan dayon sa biktima ang suspek og P2,000.

Walay kalibutan ang biktima nga nagpangagot na sa kasuko ang suspetsado ug pagkita nila sa maong lugar diretso niya kining gipusil.

Apan swerte ang biktima nga igo lang mitapsing sa iyang ubol-ubol ang bala ug milahos sa iyang abaga. Ang biktima dali nga gidala sa Vicente Sotto Memorial Medical Center.

 “Ingon pa niya nga mihatag daw siya og P2,000 sa bugaw and then nagtuo nga maayo to’ng bayhana ba, wala siya kahibalo dangtan og pila ka adlaw nasira na siya,” matud pa ni Dublin.

Dugang pa ni Dublin tumong g’yud sa suspek nga patyon ang biktima.

Gisuwayan sa Banat News pagkuha sa iyang  habig ang suspetsado kun tinuod nga nasakit siya tungod sa babaye ni Banguiso apan igo lang  siya misenyas og “thumbs up.”

“Dili na lang ko mokomento kay basin ma- banner ko ani. Mao na na ang giestorya sa polis,” sigun pa sa dinakpan.

Nakuha sa kapulisan gikan  ni Jagonos ang usa ka .45 caliber pistol nga duna’y duha ka magazine nga naa’y siyam ka mga bala ug duha ka basiyo.

Apan gawas sa kaso’ng frustrated murder nga giatubang karon sa dinakpan posibli pa nga mag-atubang sab kini og kaso nga illegal possession of firearms kung masubay nga wala’y lisensya ang iyang dala nga armas. (BANAT NEWS)