Duha patay sa bangga

CEBU, Philippines – Duha ang patay sa duha ka managlahing disgrasya sa kadalanan sa probinsya sa Sugbo niadtong nakalabay nga adlaw.

Pasado alas-7 sa gabii patay ang usa ka 55-anyos nga si Claruz Trazo,  human kini nabangaan sa usa ka motorsiklo sa dihang mitabok sa kalsada diha sa national road sa Barangay Owak lungsod sa Asturias.

Ang drayber sa motorsiklo naila nga si Rodrigo Torion, 38 nga taga Look sa maong lungsod nga nakaangkon sab og bali sa iyang tiil human nalukot sa kalsada.

Matud pa ni Senior Police Officer 1 Junard Loyao ang desk officer sa Asturias Police nga nahinabi sa Banat News, kusog ang dagan sa motorsiklo ug wala kini makabantay sa pagtabok sa biktima hinungdan nga iyang nabanggaan.

Dali nga gidala sa Balamban District Hospital ang duha apan namatay ang biktima.

Samtang sa lungsod sa Dumanjug, patay ang usa ka 22-anyos nga lalaki human kini nabangga ug nipilit sa sementadong poste sa kuryente nga sakay sa iyang motorsiklo diha sa Barangay Tapon.

Ang biktima naila nga si Marjon Domin, taga Calaboon sa maong lungsod. Sa imbestigasyon sa Dumanjug Police nasayran nga nawad-an og kontrol sa iyang motorsiklo ang batan-on ug nabangga sa maong poste sa kuryente. – /EIM) (BANAT NEWS)