Umapad transfer station sa basura

CEBU, Philippines — Nalipay kaayo ang mga opisyal sa kabarangayan sa Mandaue nga ang ilang mga garbage truck sa barangay anha na lang mohatud og mga basura sa karaang dumping area sa Barangay Umapad.

Si Mandaue City Councilor Ernie Manatad, presidente sa Association of Barangay Councils (ABC) sa Mandaue, miingon nga tukma kaayo nga ang karaang dumping area gihimo na karon nga transfer station.

Matud ni Manatad nga makadaginot gayud sa gastohan ang kabarangayan kun ang mga garbage truck sa barangay dili na mobiyahe paingon sa pribado’ng landfill sa Barangay Pulog, Consolacion.

Gitataw hinuon ni Manatad nga kinahanglang lain-lainon na daan sa mga garbage personnel sa barangay ang mga basura nga madugta ug dili madugta nga ilang ihatud sa transfer station sa Barangay Umapad.

Gikan sa transfer station, ang mga garbage truck na sa dakbayan sa Mandaue ang mohatud sa mga basura nga gi-segregate na didto sa pribado’ng landfill sa Consolacion.

Sama sa dakbayan sa Sugbo, ang Mandaue mobayad usab og P700 ngadto sa tagdumala sa pribado’ng landfill sa matag tonelada nga basura nga ilabay nila sa Barangay Pulog.

Si Engr. Ricardo Mendoza, pangulo sa Solid Waste and Management Program sa Mandaue ug mao usab ang environmental officer sa siyudad, maoy gitahasan ni Mayor Jonas Cortes pagdumala sa paghipos sa mga basura. (BANAT NEWS)