Traffic Enforcer nangilkil og manok

CEBU, Philippines — Ang Traffic Enforcement Agency of Mandaue (TEAM) mirekomendar pagtangtang sa lain na usab nila nga traffic enforcer human kini gireklamo nga nangilkil sa gidakop niini nga motorista.  Ang traffic enforcer nga si Ramon Compañero, girekomendar nga tangtangon sa iyang trabaho human gipasanginlan ni Julius Laure, 27, niadtong Pebrero 17 nga gikuha iyang dalang manok igtatari  bugti sa di paghatag kaniya og citation ticket tungod sa wala pagsul-ob og helmet.

Ang TEAM director nga si Edwin Ermac  miingon nga ang motorista nga si  Laure nga taga  Barangay Binaliw, Dakbayan sa Danao mipadangat sa iyang pinirmahang reklamo ngadto sa iyang buhatan.

Si Laure nagmaneho sa iyang Honda Crypton ug pag-abot niya sa eskina Plaridel ug dalan Jayme sa Barangay Paknaan gipara siya ni Compañero tungod kay wa siya’y helmet.

Matud pa nga pabayron siya og P4,000 nga multa tungod niini apan tungod kay wala man siya’y laing kuwarta , P200 na lamang ang iyang nahatag ug wala na siya isyuhi og citation ticket. Apan giingong nakamatikod si Compañero sa gidala niyang bulsita nga dunay sud nga manok.

Ug pagkahuman gimandoan siya niini pagpasilong sa waiting shade ug didto namarayeg kini kaniya nga hatagan siya og manok isip bayad sa violation.

Sumala pa ni Ermac, gipanghimakak ni Compañero ang pasangil ug miinsister nga si Laure maoy namugos nga ibilin iyang manok kaniya. (BANAT NEWS)