CEBU, Philippines - Mokabat sa P69 mil ang shabu nga nasakmit sa kapolisan sa lungsod sa Liloan gikan sa usa ka 25-anyos nga lalaki nga nadakpan sa barangay San Vicente alas 3 sa hapon sa niagi’ng adlaw.
Ang nadakpan naila nga si Niño Villamor Pilapil, ulitawo ug residente sa maong lugar.
Nakuha sab sa kapolisan ang .38 caliber revolver nga may lima ka bala.
Si Senior Inspector Ramil Morpos, hepe sa kapolisan sa maong lungsod, ang una’ng nakadawat og taho gikan sa wala nagpaila’ng molupyo labot sa nasigpatan nga armado’ng tawo sa lugar.
Matud pa ni Police Officer 3 Cedric Castillo nga si Morpos ug kaubanan ang nisusi ug girekisa ang suspek hinungdan nga nasakmit ang maong mga ilegal nga butang.
Si Castillo niingon nga ang suspek ila’ng gibalhug sa detention cell ug pasakaan og kaso nga kalapasan sa ilegal nga paghupot og armas ug paghupot sa ilegal nga drugas. (Romeo T. Limpangog ug NSU Intern Donahmae Gadugdug/GMR)(BANAT NEWS)