CEBU, Philippines - Nalandig sa tambalanan ang amahan ug anak human nakuryentehe sa nagkutay nga linya sa kuryente sa barangay Poblacion, dakbayan sa Toledo.
Ang mga biktima sila si Rodrigo Tura hingkod ang panuigon ug menor de edad nga anak.
Sa imbestigasyon sa kapolisan nasayran nga sakay ang mga biktima sa ilang traysikol ug paingon na unta’ng mopauli sa ilang panimalay.
Pag-abot sa Poblacion, naka-agi sila og nagyunyon nga wire ug nag-ali sa agi-anan hinungdan nga gisuwayan sa amahan pag-isa ang wire apan nakuryentehan ug nikirig samtang na-among sab ang anak niini hinungdan sa pagkalandig sa tambalanan.
Iya sa Cebu Electric Cooperative III ang nagyunyon nga linya sa kuryente, hinuon ang general manager nga si Virgilio Fortich niingon nga nihatag na sila og ayuda’ng pinansiyal alang sa mga biktima. (BANAT NEWS)