CEBU, Philippines - Napanglantawan ang pagminus sa abot sa kaumahan karon nga nagsingabot ang kainit sa mild El Niño phenomenon karong Abril ug Mayo.
Matud ni provincial agriculturist Ronald Saragena nga mo-epekto ang daku nga pag-ubos sa ani sa mga lugar nga wala’y sakto’ng suplay sa tubig ug nagsalig lang sa uwan.
“But those farms with existing irrigations makapabor sad sila, kay by law of supply and demand mogamay ang production sa crops, makapabor pud to’ng areas with existing irrigation system kay siya ang maka-produce og utanon this time nga makahatag og maayo’ng yield niya,” sigun pa ni Saragena.
Tambag ni Saragena sa mga mag-uuma nga magtanum og mga utanon nga dali ra ma-ani sama sa petchay, kangkong, okra, kalabasa ug uban pa.
“Pero kadto gani’ng mga lugar nga wala’y igo’ng suplay sa tubig di lang una mananum kay segurado’ng mangamatay gyud sa grabe nga kainit,” dugang pa niya.
Giawhag usab ni Saragena ang mga mag-uuma nga mo-avail sa agri-fishery insurance program sa Kapitolyo aron mahatagan og ayuda kung madaut nga mga pananum ug kahayupan. (BANAT NEWS)