Laing upat ka suspek gipangita
CEBU, Philippines - Duna pa’y upat ka mga suspetsado ang gipangita sa kapulisan may labot sa pagpamusil sa mga langyaw sa dakbayan sa Talisay nga gikamatay sa usa ka German national.
Ang hepe sa Regional Special Operations Task Group-7 nagkanayon nga ang ilang gipangita mao sila si Dexci Gomonte, alyas Tata, usa ka alyas Mak-Mak, Gilbert ug laing usa ka kauban nga wala pa nailhan.
Si Derilo miingon nga si Gomonte mao’y numero uno nga mipusil sa mga langyaw samtang sila si Mak-Mak ug Gilbert mao ang gikalalis sa Indian ug French sa wala pa ang pagpamusil.
Bisan pa man og napasaka na sa kapulisan ang kasong murder ug frustrated murder batok ni Gomonte ug sa laing tulo nga sila si Ricci Edwin Ramirez Jr., Allano Velos ug Roger Cal, ilaha pang pangitaon ang ubang suspetsado.
Gikonsiderar nga “armed and dangerous” ang maong mga suspetsado.
Namatay sa maong pagpamusil ang German nga si Heinrich Haffner ug naangol ang French ug Indian nga sila si Julian Maillard ug Cheten Sapariya.
Sa laing bahin, nakapiyansa na sa kasong gipasaka sa iyang asawa si Maillard kinsa gidakop tungod sa warrant of arrest gikan sa Siquijor. (BANAT NEWS)
- Latest
