CEBU, Philippines - Patay ang usa ka tawo ug grabeng naangol ang angkas niini dihang nabangga ang ilang motorsiklo sa gikasugat nga cargo truck sa Barangay Luyang, lungsod sa Carmen.
Ang namatay mao si Arnel Boganotan, 37, taga Barangay Tangke, Dakbayan sa Talisay ug ang grabeng naangol nga iyang angkas mao si Rene Pepito nga taga dakbayan sa Sugbo.
Matud pa ni Senior Police Officer 2 Simplicio Gibo nga padulong sa siyudad sa Sugbo ang motorsiklo nga gidala ni Boganotan ug mi-overtake sa gisundan nga motorsiklo.
Apan nabangga kini sa gikasugat nga cargo truck nga gimaneho ni Joel Amatong, 29, taga Barangay Taluot, lungsod sa Argao.
Maayong pagkalamba sa duha diha sa dalan ug daling gidala sa Danao Provincial Hospital apan giingon nga dead on arrival na si Boganotan samtang gibalhin si Pepito sa Vicente Sotto Memorial Medical Center sa Dakbayan sa Sugbo.
Si Amatong temporaryo na nga gitanggong sa Danao police alang sa pagpasaka og kaso batok kaniya. (BANAT NEWS)