UCLM-CRIM motabang batok basura

CEBU, Philippines - Motabang ang mga tinun-an sa criminology sa University of Cebu Lapu-Lapu and Mandaue (UCLM) sa kampanya sa tukma’ng paghipos sa mga basura.

Usa ka Memorandum of Agreement (MOA) ang gilagdaan nila’ng Mandaue City Mayor Jonas Cortes ug tagdumala sa UCLM.

Si Engineer Ricardo Mendoza, pangulo sa City Environment and Natural Resources Office (CENRO), niingon nga ang suliran sa basura kaakohan dili lang sa kagamhanan kun dili lakip na sa nagkadaiyang sektor nga naglakip sa mga tinun-an.  Si Atty. Maricar Ruñez, campus director sa UCLM, niingon nga ang nakat-onan sa ilang mga tinun-an mahimo kaayo’ng ikapaambit ngadto sa mga molupyo pinaagi sa awareness seminar sa kabarangayan.

Si Roger Sulad, committee on environment ug dean sa criminology sa UCLM, niingon nga lakip ang mga criminology intern nga ubos sa supervision sa kapolisan ang mosalmot sa kalihukan.

Mapasalamaton si Cortes sa tagdumala sa tunghaan sa ilang gipakita’ng suporta sa tukmang paghipos sa basura. Si Atty. Valdimar Estenzo nga maoy nagrepresentar sa UCLM niingon nga ang paglambigit sa mga tinun-an ilang giisip nga kabahin sa pagkat-on sa mga tinun-an nga ilang magamit sa higayun nga mahingpit na sila’ng sakop sa kapolisan. (Romeo T. Limpangog/GMR)(BANAT NEWS)