Japanese nailad

CEBU, Philippines - Dalagang Japanese national nabiktima sa mga kawatan, iyang mga gamit gidala sa mga kawatan nga nagpatuo nga makighigala kaniya diha sa E-Park sa Meñoza Street, Talamban ning dakbayan.

Ang biktima naila nga si Chihoko Mirami, 22, taga Higashosako, Japan ug temporaryo nga nagpuyo dinhi sa dakbayan. Matud pa ni Police Officer 1 Gringo Muldez, ang desk officer sa Talamban Police nga nahinabi sa Banat News, naglingkod sa lugar ang biktima dihang giduol sa duha ka mga lalaki ug nakig-estorya.

Gikatahong nalingaw ang dalaga sa ilang giestoryahan nga kabahin sa mga nindot suroyan sa Sugbo, ug paglabay sa pipila ka minutos nananghid ang duha samtang nabilin ang dalaga.

Nakurat na lang siya dihang iyang nabantayan nga wala na iyang bag nga dunay sud nga laptop, iphone, USB ug mga chargers sa iyang mga gadgets.

Apan si Muldez miingon nga ilaha kining imbestigahon sanglit daghan nang insidente nga nagpa-blotter kanila kay ang tuyo diay nga makapangayo og police report aron ipresentar sa insurance company aron sila bayran sa nahanaw nga mga gamit.  (BANAT NEWS)