CEBU, Philippines – Naunay sa iyang pusil ang usa ka security guard human giilog sa usa ka construction worker sulod sa guardhouse sa usa ka establesemento sa barangay Mactan, dakbayan sa Lapu-Lapu kagahapon sa alas 9:30 sa buntag.
Si PO3 Lydo Pinos sa Lapu-Lapu City Police Office- Homicide Section niingon nga usa ka panaglalis ang nahitabo tali sa biktima nga si Ruben Arrogante, sakop sa MAYA Security Agency, ug sa suspek nga si Bernabe Danda, lumad nga taga Sibugay, Zamboanga Del Sur ug usa ka construction worker.
Sa inisyal nga pakisusi sa kapolisan, si Arrogante, samtang duty sa guardhouse, kalit niabot si Danda ug nakiglalis dayun ilog sa pusil sa guwardiya.
Nakaangkon og samad pinusilan si Arrogante duol sa iyang tuo’ng mata.
Gidala sa Mactan Doctors Hospital ang biktima samtang nadakpan ang suspek sa mga niresponde’ng polis. – /GMR) (BANAT NEWS)