CEBU, Philippines – Mokabat sa 12,000 ang gidaghanon sa nagkadaiyang matang sa libro ang nadawat sa kagamhanan sa dakbayan sa Mandaue gikan sa Rotary Club of Kapolei Sunset ug Rotary Club of Mandaue East.
Si Roger Paller, public information officer sa dakbayan, niingon nga si Mayor Jonas Cortes ang nidawat sa mga libro nga naglakip sa almanacs ug teaching guides nga ipangapod-apod ngadto sa 48 ka publiko’ng tulunghaan sa dakbayan.
Dugang ni Paller nga ang donasyon kabahin sa ilang kalihukan sa 25th Trade Mission sa maong dakbayan.
Gipangulohan ni Lieutenant Gov. Shan Tsutsui sa estado sa Hawaii; Consul General Gina Jamoralin sa Consulate sa Pilipinas sa Hawaii ug ni Pilipino Chamber of Commerce of Hawaii president Paul Alimbuyao ang misyon.
Matud ni Paller nga si James Handsel sa Rotary Club Kapolei Sunset ang naningkamut nga matigayun ang pagdonar sa maong mga libro alang sa kabataan sa dakbayan sa tuyo nga katabangan kini sa pagpalambo sa edukasyon.
Si Angelina Cagatulie, city librarian niingon nga ilang bahigon ang maong mga libro sa dili pa nila himuon ang pag-apod-apod niini ngadto sa mga tulunghaan. – /GMR) (BANAT NEWS)