Pundo alang sa IEC 2016 miabot pa lang og P5M

CEBU, Philippines – Kapin na sa usa ka tuig ang milabay human gisugdan ang "Piso Mo para sa Misa ng Mundo” alang sa International Eucharistic Congress sa 2016, apan P5 milyones pa lang ang ilang natigom sa gikinahanglang P600 milyones.

Gitug-an sa chairman niini Father Charles Jayme nga kulang pa kini sa pundo nga ilang gikinahanglan.

Gisugdan niadtong buwan sa Agosto sa miaging tuig ang “Piso Mo Para sa Misa ng Mundo” pinaagi sa pagbutang og mga donation boxes sa mga simbahan sa parokya lukop nasud aron pagtigom sa gikinahanglan nga P600 milyones.

Ang 90 porsiyento sa maong kuwartang natigom naggikan tanan dinhi sa Archdiocese sa Sugbo.

Hinoon, malaumon si Father Jayme nga madugangan pa kini human mipasalig ang mga simbahan sa kaulohan nga ilaha kining tutokan karong nahuman na ang pagduaw sa Santo Papa niadtong Enero.

Ang IEC ipahigayon sa Enero 24 hangtud sa 31 sunod tuig nga gipaabot tambongan sa liboang kaparian ug Obispo sa Romano Katoliko sa kalibotan.

Ang maong kuwarta gamiton alang sa mga tukorong pasilidad ug palitong mga kahimanan sama sa ‘interpreter’ gadgets tungod kay managlahi man nga pinulongan ang mga Obispo gikan sa ubang mga nasud.

Lakip sa mihatag og donasyon ang mga tinun-an sa mga nagkadaiyang eskuylahan ug mga dagkong tindahan pinaagi gipamutang nga donation boxes. – /EIM) (BANAT NEWS)