CEBU, Philippines – Mokabat sa P1 milyon nga kantidad sa alahas ug P100 mil nga cash ang nahanaw gikan sa usa ka pawnshop nga gilungkab sa gidudahang sakop sa Acetylene Gang nga mga kawatan sa Barangay Basak, Dakbayan sa Mandaue nga nadiskubrehan sa tag-iya alas-8 na pasado ang takna kagahapon sa buntag.
Si Police Officer 3 Arvin Palompon sa kapolisan sa Presinto 3 sa Mandaue City Police Office (MCPO) miingon nga ang gilungkab mao ang M.S.C. Pawnshop nga gipanag-iya ni Manuel Conde nga taga Barangay Pagsabungan sa maong dakbayan.
Nadiskubrehan ni Conde nga gilungkab ang iyang pawnshop dihang mangabli na unta kini kagahapon.
Gituohan nga gabii gihimo sa mga kawatan ang paglungkab ug diha sila nanukad sa bakanteng luna sa luyo sa maong establisamento ug mikatkat sa atop ug gilungkab ang atop aron sila makasulod sa kasilyas. Gikatahong gigamitan sa mga kawatan og portable acetylene torch aron pagputol sa steel cabinet nga gisudlan sa mga alahas ug kuwarta.
Lakip sa gisakiyo sa mga kawatan ang usa ka cellphone ug usa ka laptop.
Walay guwardiya ang maong prendahanan ug wa say nakuha ang Close Circuit Television (CCTV) nga gitaud sa nahisgotang establisamento tungod kay giingong gipawong kini sa mga kawatan. – /EIM) (BANAT NEWS)