Farmer Scientists

CEBU, Philippines – Miabot na og 20 ka “farmer-scientists” ang gipasidunggan sa Kapitolyo human nahimong malampuson sa ilang tinguha sulod sa 20 ka tuig.

Ang uban sa maong mga mag-uuma migradwar sa Farmer-Scientist Training Program sa Kapitolyo kapin na sa usa ka dekada ang milabay.

Matud sa Provincial Information Office nga kini base sa gihimong mga interbyu ngadto sa mga mag-uuma nga gihimo sa College of Agriculture sa University of the Philippines-Los Baños.

Ang report sa UPLB gihimo atol sa ika-20 nga FSTP Anniversary Conference and Program didto sa Colawin Elementary School sa Argao, Cebu kaniadtong buwan sa Disyembre sa milabay’ng tuig.

Gibutyag sa maong report nga kasagaran sa mga malampusong mag-uuma mokita og di mominus sa usa ka milyon  kada tuig.

Usa sa mga farmer-scientists mao si Jose Ruben, taga-barangay Cansuje sa Argao, una nang gipasidunggan atol sa gipahigayong ika-7 nga FSTP Congress kaniadtong Oktubre sa miaging tuig.

Human sa pipila na ka tuig nga paningkamot, aduna na siya’y duha ka andana nga balay ug brand new 2014 model nga pick-up, matud sa maong report.

Ang iyang silingan nga si Marciano Agrabio, nga migradwar sa FSTP mga kapin sa napulo na ka tuig ang milabay, nakapalit na usab og balay ug usa ka van.

Si Agrabio nga karon usa na usab ka kapitan sa barangay Cansuje sa Argao nakahimo usab og pagpa-eskwela sa iyang tulo ka mga anak nga karon mga propesyonal na.

Gawas ni Agrabio ug Ruben, ang mga mosunod mao usab ang mga “farmer-scientists” sa Argao nga gipasidunggan na sa Kapitolyo.

• Joseph Montañez  (Barangay Apo),

• Dennis Gil (Barangay Mompeller),

• Vivencia Sarona (Barangay Colawin),

• Felicidad Orteza (Barangay Mompeller),

• Jovencio Lanticse (Barangay Cansuje),

• Julian Geverola (Barangay Gutlang),

• Marcus Barricuatro (Barangay Bulasa),

• Guillerma Villanueva (Barangay Langub),

• Leonito Manzanades (Barangay Apo),

• Elijah Comaling (Barangay Cansuje),

• Juanito Lanticse (Barangay Bug-ot),

• Paz Caminse (Barangay Linut-od),

• Danilo Zamora (Barangay Linut-od),

• Isidro Sarona (Barangay Colawin),

• Ariston Panerio (Barangay Colawin),

• Joel Templa (Barangay Mompeller),

• Ferma Templa (Barangay Mompeller), ug

•   Julita Mamites (Barangay Cansuje).

Si Gobernador Hilario Davide III miingon nga ipadayon sa iyang administrasyon ang  malampusong programa ug gahinan og dugang pang pundo alang niini karong tuiga.

Natukod ang FSTP diha sa Argao kaniadtong tuig 1994 pinangunahan sa FSTP National Program Leader Dr. Romulo Davide, usa usab ka Ramon Magsaysay Awardee ug agriculture consultant sa Kapitolyo.

Ang katuyoan sa maong programa  mao ang pagtudlo sa mga mag-uuma og mga paagi alang sa malungtaron ug malambuong panguma.(EIM) (BANAT NEWS)