CEBU, Philippines – Usa ang patay ug usa ang angol sa nahitabong pagpamusil sa F. Jaca Street, Barangay Inayawan ning dakbayan sa Sugbo.
Ang namatay naila nga si John Brendo Balbuena, 25, taga Sitio Torre sa maong barangay, samtang ang naangol naila nga si Jomel Taboada, 25, drayber og habal-habal nga taga Barangay Cogon-Pardo.
Sa imbestigasyon sa Homicide Section sa Cebu City Police Office, nagbarog sa kilid sa dalan si Balbuena dihang kalit kining gipaulanan og bala, ug dihang nahagba na kini, giduol kini sa gunman og gitiwasan.
Si Taboada nga padung unta mopalit og balot nianang tungora napagan human naigo sa iyang tiil.
Si Balbuena ug Taboada dali nga gidala sa Cebu City Medical Center sa mga sakop sa Inayawan Rescue Unit.
Matud ni Senior Police Officer 4 Rey Cuyos ang imbestigador sa maong kaso nga nahinabi sa Banat News, posibleng si Balbuena ray tuyo sa gunman ug napagan lang si Taboada.
Gikatahong nakasuot og itom nga ski mask, itom nga t-shirts ug maong nga pantalon ang gunman, duna kini kaubang nagpaabot sakay nang daan sa usa ka motorsiklo.
Personal nga bikil maoy usa sa gitutokang anggulo sa motibo sa maong hitabo. – /EIM) (BANAT NEWS)