Gipusil sa ig-agaw sa uyab

CEBU, Philippines - Nakalingkawas sa kamatayun ang 18-anyos nga lalaki kinsa gipusil sa makadaghan nga higayun samtang nag-date ug iya’ng hinigugma duol sa Malacañang sa Sugbo niadtong niaging gabii.

Ang biktima naila nga si John Ryan Dela Peña, taga Silangan I, Tinago, dakbayan sa Sugbo samtang gitudlo’ng suspek ang usa ka Carlo Martorillas, taga Bato, Carbon, barangay Ermita ug ig-agaw ra sa uyab sa biktima.

Matud ni SPO2 Rommel Bancog, imbestigador sa homicide section sa Cebu City Police Office, nga kalit lang naabot ang suspek kauban ang iyang mga barkada sa lugar.

Human sa pipila ka minutos, nibunot og armas ang suspek ug gipusil ang biktima sa makatulo ka higayun.

Nakaangkon og samad pinusilan sa iyang wala nga kamot, dughan ug likod sa iyang liog ang biktima kinsa gidala sa Cebu City Medical Center samtang dali nga nisibat ang suspek.

Ang suspek giingo’ng nasuko sa biktima human matud pa iyang gidapatan ang uyab. (Jojo C. Ugdol/GMR)(BANAT NEWS)