Negosyante’g kopras gipusil sa katabang
CEBU, Philippines - Patay ang negosyante og kopras human pusila sa iya’ng sakop sa balay nga mao’y iyang sugo-sugoon sa sitio Cabadiangan, barangay Jomgao, lungsod sa Argao niadto’ng nakalabay nga gabii.
Ang biktima giila nga si Vito Pantinople, 39, ug nagpuyo sa maong lugar samtang ang suspek naila nga si Vresnib Aballe, 21, taga sitio Kabag-ohan, Panadtaran, sa maong lungsod, kinsa nitahan ra sa mga barangay opisyal.
Matud ni Sr. Insp. Alejandro Batobalonos, hepe sa Argao Police, nga ang suspek namahayag nga napugos lang kini pagpusil sa biktima human giingo’ng una’ng giti-onan og pusil apan iyang nailog ug napusilan.
Ang suspek nipasangil nga kanunay lang kini nga tionan og armas ilabi na daw kung maka-inom ang biktima. Halos kapin na sa unom ka tuig nga nag-trabaho si Aballe sa biktima. Ang ig-agaw sa biktima niingon nga sa wala pa nahitabo ang pagpamusil, iya pa nga nadungog nga nagpakiluoy ang biktima apan iya na lang nadungog ang buto sa armas ug dali nga nisibat ang suspek.
Igo sa tiyan sa makaduha ka higayun ang naangkon ni Pantinople.
Wala na narekober sa mga polis ang.38 revolver nga iya sa biktima nga gigamit sa pagpusil nga matud pa ni Aballe iya’ng gilabay human sa krimen.
Kaso’ng murder ang ipasaka sa kapolisan batok sa suspek nga gitanggong sa karsel sa Argao Police Station. (Jojo C. Ugdol/GMR)(BANAT NEWS)
- Latest
