CEBU, Philippines - Maayong pagkakagay sa ulo sa usa ka lalaki human kini gipusil sa lalaking iyang gibadlong nga sakay sa saba kaayo nga motorsiklo diha sa Sitio Media, Barangay Poblacion lungsod sa Argao.
Ang biktima naila nga si Noel Sarcauga Teo, 43, nagpuyo sa maong lugar, samtang gitudlong gunman naila nga si Willy Dayaganon, ug ang kauban niini nga nagmaneho sa motorsiklo nga si Fermin Sarcauga, 50, nga ig-agaw ra sa biktima.
Matud pa ni Senior Inspector Alejandro Batobalonos ang hepe sa Argao Police nga nahinabi sa Banat News sayo nianang adlawa gibadlong sa biktima si Dayaganon tungod kay saba kaayo ang tingog sa motor niini.
Giingong nasagpaan sa biktima ang suspek kinsa daling milakaw apan mibahad sa pag-ingon: “bantay lang ka, balikan tika.” Paglabay sa pipila ka minutos miabot ang suspek angkas sa motor nga gimaneho ni Sarcauga ug kalit nga gipusil sa ulo ug lawas ang biktima hinungdan sa kamatayon niini.
Matud pang Batobalonos wa masayod si Sarcauga nga dunay pusilon si Dayaganon dihang gihagad siya niini nga manglakaw, wala usab kini nasayod nga patyon diay ni Dayaganon ang iyahang ig-agaw.
Sumala pa ni Sarcauga sa mga polis nanabon na lang siya sa iyang nawong ug mituman sa mando ni Dayaganon . Matud niya gihulga siya niini nga patyon kun mosumbong.
Apan sa gihimong follow up operation nadakpan sa Barangay Oba-od si Dayaganon ug si Sarcauga sa balay niini. Si Sarcauga matud pa andam mobarog nga testigo batok sa amigo, ang duha gitanggong na karon sa prisohan. (BANAT NEWS)