CEBU, Philippines – Kritikal ang usa ka kawani sa Kapitolyo kinsa gipusil sa South Road Properties sa Lawaan 2, dakbayan sa Talisay pasado alas 11 niadto’ng Domingo sa gabii.
Si Mark Lanit, 35, minyo, taga barangay Cabcaban, lungsod sa Barili, sakay sa iyang multicab dihang gipusil sa gunman nga sakay sa usa ka Montero Sports nga “for registration” pa ang plaka.
Sa imbestigasyon sa Talisay City Police Station nasayran nga samtang nagdagan ang multicab sa biktima gikan sa Barili daan na nakabantay si Lanit nga gikan pa lang sa San Fernando nagsunod na ang maong SUV.
Pag-abot sa nahitaboan kalit lang nibabag sa dalan ang SUV dayun pusil sa sakay sa Montero kang Lanit.
Igo sa bukton ug dughan ang naangkon ni Lanit apan nakamaneho pa kini sa iyang sakyanan paingon sa Talisay City Hospital samtang ang gunman dali nga nipasirit sa iyang sakyanan palayo sa lugar.
Si PO1 John Ilustrisimo, desk officer sa Talisay City Police Station, niingon nga tanang anggulo ang gisubay karon lakip na ang pagsubay sa record sa biktima kung wala ba kini nakaaway sa wala pa nahitabo ang krimen.
Dunay nakuha nga 9mm pistol ang kapolisan gikan sa biktima nga lisensiyado apan wala nagamit ni Lanit human naunhan sa pagpusil.
Gikompirmar ni Bokal Alex Binghay nga iyang staff ang napusilan.
Matud ni Binghay nga wala siya nasayud sa motibo sa krimen sanglit wala siya kadungog gikan ni Lanit nga adunay mga pagpanghulga sa kinabuhi.
Dugang niya nga buotan nga empleyado si Lanit ug kapin na sa lima ka tuig nga nagserbisyo kaniya.
Gibutyag ni Binghay nga nakit-an ni Lanit ang usa ka batan-on nga nanaug sa SUV ug nagsuot lang og T-shirt ug short pants ug military cut ang tupi niini. – /GMR) (BANAT NEWS)