Pagtukod sa water authority gisupak
CEBU, Philippines – Gisupak sa ubang grupo ang tinguha nga magtukod og Cebu City Water Resources Authority atol sa public hearing sa konseho niadto’ng Pebrero 4.
Lakip sa nisupak ang Metro Cebu Water District (MCWD), Alliance of Government Workers in the Water Sector, usa ka pribado nga water utility service provider, ug si Celestino Bustamante.
Adunay uyon sama sa Freedom from Debt Coalition-Cebu (FDC), Consumer’s Rights and Economic Welfare (CREW), Kaabag sa Sugbo, Water Resources Center, Urban Poor Sector, ug si Architect Socorro Atega.
Ang maong plano nalatid sa ordinansahon nga giduso nila’ng Konsehal Noel Eleuterio Wenceslao ug Ma. Nida Cabrera.
Matud ni Tito Villagonzalo, president sa FDC, nga kinahanglan gyud ang maong ordinansa tungod kay ang tubig usa sa importante nga basic necessity sa katawhan.
Sigun ni Jose Gapus, representante sa Kaabag sa Sugbo, nga kung dili maatiman ang water resources, tanang water systems mangauga ra.
Matud ni Engineer Lazaro Salvacion, environment department manager ug assistant general manager for operations sa MCWD, nga uyon sila sa paghimo’g mga programa ug pakiglimbasog sa ubang sektor alang sa pag-protekta sa water resources.
Apan matud ni Salvacion nga ang paghimo og Cebu City Water Resources Authority usa na ka duplication sa existing nga National Water Resources Board.
Hinuon iyang gisugyot sa konseho nga hatagan og ngipon ang memorandum of agreement tali sa siyudad, NWRB ug MCWD nga nagprotektar sa tanang water sources sa siyudad.
Awhag ni Bise Mayor Edgardo Labella nga moduso og position paper ang mga grupo aron maapil ang mga concerns niini sa pagtuki sa ordinansahon sa konseho. – /GMR) (BANAT NEWS)
- Latest
