Re-routing sa Mandaue di pa mapatuman
CEBU, Philippines - Dili pa hingpit mapatuman ang giplano’ng re-routing scheme sa mga pangpubliko’ng sakyanan sa dakbayan sa Mandaue samtang nagpadayun pa ang mga pagtuon.
Si Edwin Ermac, operations chief sa Traffic Enforcement Agency of Mandaue (TEAM), miingon nga ila’ng gipaabot ang kahugpungan sa mga drayber ug operator makaduso sa ilang sugyot pagseguro nga dili maglisud og kasakyan ang mga nagpuyo sa hilit nga lugar.
Matud ni Ermac nga makigtagbo sila sa kadagkuan sa kahugpungan sa mga drayber pagsuta sa sugyot nga mga rota.
Si Ermac niingon nga bisan gihingusgan na sa Department of Public Works and Highways (DPWH) ang dili na pagpaagi sa mga traysikol sa mga national roads, dili pa nila matino kun kanus-a mahingpit ang pagpatuman.
Kini tungod kay mahimo man nga suliran sa mga nagpuyo sa kabarangayan diin traysikol lang ug habal-habal ang ilang gisaligan nga kasakyan. (BANAT NEWS)
- Latest
