Gustong ma-exempt sa buhis

CEBU, Philippines - Dinhi sa Sugbo gipahigayon ang ika-36 nga National Convention sa Philippines Association of Water District (PAWD) nga panagtigum sa tanang tagdumala sa water districts lukop nasud. Kapin sa 1, 200 ka mga kadagkuan ug kawani sa 800 ka mga water districts lukop nasud ang ania sa Sugbo sukad pa niadtong Martes alang sa maong tigom nga ang Metro Cebu Water District ang host sa maong convention.

Gipasabot ni General Manager Art Villasan kinsa maoy tigpamaba sa PAWD ang mga water district kontrolado sa gobiyerno pinaagi sa mga mayor nga maoy motudlo sa mamahimong director. Apan wa kini nagdawat og subsidiya gikan sa gobiyerno ug nag-operate susama og pribadong kompanya. Ang ilang kita gikan sa mga konsumidor mao ra usab ang gigamit sa mga water district alang sa pagpalambo sa ilang serbisyo.

Hinungdan ilang gihingusgan nga mapasar na ngadto sa Senado ang balaudnon nga kahatagan sila og exemption sa gipangayo nga bayrunon sa income tax sa Bureau of Internal Revenue (BIR) diin daghan na kanila ang gikasuhan na og tax evasion.

Gipasabot ni MCWD Manager Ernie Delco nga non-profit institution ang water districts nga kontrolado sa gobiyerno.

Ang buhis nga gipatong kanila ila  ihapak sa mga konsumidor.  Ang balaudnon nga gisuportaran nila kanhi Senador Ralph Recto  ug Senador Sonny Angara anaa na karon sa 2nd reading. (BANAT NEWS)