Pamilyang Coliflores mokiha sa MCH

CEBU, Philippines - Gihimakak sa pamilyang Coliflores ang pangangkon sa Mandaue City Hospital nga mihimo sila og “skin test” una pa gihatag ang usa ka matang sa antibiotic ngadto kang Jocelyn Coliflores nga misteryosong namatay samtang giatiman sa maong tambalanan.

Kini maoy pamahayag sa pamilyang Coliflores nga naglakip sa bana ni Jocelyn nga si Cesar, mga igsuon sa namatay ug sa ilang abogado nga si Atty. Inocencio Dela Cerna.

Ang mga Coliflores nakigtagbo na sa  kadagkoan sa Department of Health Central Visayas nga maoy mihimo og fact-finding investigation bahin sa ilang reklamo batok sa MCH. Apan migawas sa imbestigasyon sa DOH, wala sila makakita og kasaypanan sa operasyon sa MCH nga miresulta sa kamatayon sa maong ginang.

Apan wala iapil sa imbestigasyon sa DOH ang kabahin sa reklamo sa pamilya nga dunay nahitabong medical malpractice maong namatay ang pasyente, kay matud pa sa DOH kaakohan kini sa Professional Regulations Commission (PRC).

Usa sa mga nakasaksi,  human giturukan sa  antibiotic si Jocelyn naglain og samot ang paminaw niini ug kalit nga nag-wild.

Matud pa gigapos kini ug giposasan sa lima ka mga nurses ug sa usa ka security guard sa maong tambalanan.

Ang nahitabo sa ginang nakuhaan og video sa usa sa iyang mga anak nga gisugo mismo sa pasyente tungod kay lahi na g’yud ang iyang pamati human siya gihatagan sa maong tambal.

Tungod sa maong mga wala maesplikar nga nahitabo, nagplanong ipadayon sa pamilya ang pagpasaka og kasong homicide ug administratiba batok sa mga responsable ngadto sa buhatan sa Visayas Ombudsman.

Moduso usab sila og reklamo sa PRC ug sa Philippine Medical Association kalabot sa gituohan nilang nahitabong medical malpractice.

Andam usab nilang tumanon ang sugyot sa DOH-7 nga ipa-reautopsy ang patay’ng lawas ni Jocelyn ug ang uban pang makuting proseso niini aron mahibaw-an kun unsa g’yuy gikamatyan sa ginang.

Giklaro hinuon sa director sa DOH-7 Dr. Jaime Bernadas nga wala nila gi-clear ang Mandaue City Hospital sa posibleng tulubagon niini sa pasyente ug sa pamilya. (BANAT NEWS)