CEBU, Philippines – Gi-turnover na sa United States Navy Seabees pinanguluhan ni Lt. Michael Sapienza ang usa ka pasilidad nga ilang giayo ngadto sa Department of Social Welfare and Development-7 human sa halos upat ka buwan nga pagtrabaho.
Ang gi-renovate ang skills training area sa DSWD Area Vocational Rehabilitation Center sa Labangon, Cebu City ug sa Regional Rehabilitation Center for Youth sa lungsod sa Argao.
Gitug-an ni Sapienza nga ang ilang kadagkuan sa US Navy ang nagpili kun kinsa ang ilang hatagan sa tabang diin sila mismo ang nigasto sa mga materyales nga mobalor og kapin sa usa ka milyon ka pesos ug sila mismo ang nitrabaho. Mapasalamaton si DSWD-7 Director Mercedita Jabagat sa gibubo’ng kwarta, panahon ug kahago sa US Navy pagtabang sa ilang programa.
Mas gikalipay kini sa mga benepisyaryo’ng may kabilinggan sa panglawas sama ni Rey John Cuyos, kinsa hanap ang panan-aw.
Matud niya nga kun kaniadto maglisud sila kun mabahaan ang ilang agianan sa pagbalhin-balhin og lawak, karon hayahay na alang kanila nga wala’y sagabal sa ilang paglakaw sulod sa sentro.
Sunod nga proyekto sa US Navy mao ang pagtabang sa Department of Education pagtukod og dugang pa’ng mga lawak saringan. – /GMR) (BANAT NEWS)