CEBU, Philippines - Maanyag nga 16-anyos nga gipasanginlang nangilad sa usa ka resort ug parlor i-turnover na og kustodiya sa dakbayan sa Tacloban.
Matud ni Bise Gobernador Agnes Magpale nga walay bisan usa sa pamilya sa dalagita ang buot nga mokustodiya niini gumikan kay una na nga mibalibad ang amahan sa pagdawat ug masakiton ‘sab ang inahan niini.
"She belongs to that province (Sogod), ila siyang responsibility. Although, dili na modawat ang ubang centers, naninguha g’yud ‘ta pero, wa man ‘sad ang pamilya," ni Magpale.
Ipailawom ang maong dalagita og Diversion Program ngadto sa center sa Department of Social Welfare and Development (DSWD) sa Tacloban City kauban ang mga resulta sa gihimong mga eksaminasyon kaniya.
Una na nga misibog ang mga reklamante niini nga maoy usa sa rason nga mahimo na siyang mobiyahe.
Nagkanayon si Magpale nga nakahimo na ‘sab kini og daghang kalapasan samtang gikustodiya kini sa social welfare sa probinsya ug usa ang pagsuway niini og hikog pinaagi sa pagtumar og tambal nga angay ra unta sa adunay sakit nga tuberculosis (TB) hinungdan nga lisod na g’yud kining atimanon. (BANAT NEWS)