Pinanser sa casino gipatay

CEBU, Philippines – Wala na madala pa sa tambalanan ang usa ka lalaki human gibanhigan-patay kagahapon sa kaadlawon samtang nagmaneho sa iyang sakyanan sa Highway Seno, siyudad sa Mandaue.

Giila ang biktima nga si Nestor Jumao-as, 54, residente sa Barangay Bulacao, siyudad sa Sugbo samtang padayon pa nga giila ang tulo ka mga suspek nga pulos naka full-faced helmet.

Base sa gihimong imbestigasyon sa kapulisan sa Mandaue City Police Office tigpatanto og kwarta sa casino ug didto kini gikan sa Waterfront Mactan.

Ang biktima padung na mouli sakay sa iyang Mitsubishi Mini Pajero apan pag-abot niini sa stop light sa Tipolo, ang usa sa mga kakunsabo ang nag-atang na daan nga maoy nagsilbi nga lookout.

Dihang nidagan na ang mga sakyanan, ang laing duha ka mga lalaking luwan sa motorsiklo ang nidungan sa biktima ug ang angkas nipusil kang Jumao-as.

Gidugang ni Police Inspector Zenaido Sanchez, ilaha na nga nahinabi ang asawa sa biktima ug kini miingon nga wala sila nakadawat og hulga sa iyang bana ug wa usab siyay kasayuran nga duna kini kontra. Wa gisalikway sa kapolisan ang anggulong may kalabutan sa pagpautang og puhonan sa mga sugarol sa casino ang motibo niini.

Nakuhaan sa CCTV camera sa siyudad sa Mandaue ang pagpamusil apan hanap kaayo ang kuha niini kay di mabasa ang plaka sa motor.

Ang biktima nakaangkon og tulo ka samad pinusilan sa ulo hinungdan sa iyang kamatayon, nakuha sa crime scene ang onse ka kabhang sa .45 kalibre nga armas. – /EIM) (BANAT NEWS)