CEBU, Philippines – Duha ka mga Sugboanong polis ang naapil sa napatay nga mga sakop sa Special Action Force didto sa Mamasapano, Maguindanao nga gihulagway nga gimasaker sa mga sakop sa Moro Islamic Liberation Front (MILF) ug teroristang Bangsamoro Islamic Freedom Fighters (BIFF).
Sila mao si Police Officer 2 Wendel Candano, taga-Lawaan sa lungsod sa Dumanjug ug si Police Officer 1 Romeo Cempron nga taga Barangay Tayud, Consolacion.
Nahibulong
Igo na lang sa pagsud-ong ug paghandom si Dr. Christine Abucay-Cempron sa malipayon nilang hulagway sa banang si PO1 Cempron dihang nakahinabi sa Banat News sa ilang balay.
Matud pa ni Dr. Cempron nasayod na siya nga dunay operasyon ang iyang bana apan nagtuo kini nga uban nila ang militar, nianang milawom na ang gabii, nabalaka na siya tungod kay wala man mo-text kaniya ang bana nga mao man untay sagad niining buhaton.
Dihang iyang gi-text, ang mitubag niini mao ang kauban sa iyang bana nga maoy mipahibalo kaniya sa subo kaayo nga balita, wala hinuon siya dayon motuo niini apan gikompirmar kini sa buhatan sa iyang bana.
Matud sa ginang nga daw gihimong paon ang mga polis sa maong hitabo ug buot niyang dunay imbestigasyon nga himuon kabahin niini. Si PO1 Cempron kapin pa lang sa lima ka tuig sa serbisyo sa kapulisan ug nadestino kini sulod sa duha ka tuig didto sa Basilan ug tulo ka tuig sa Zamboanga.
Nagkauyab ang duha sulod sa unom ka buwan una pa sila nagpakasal niadtong Disyembre sa tuig 2012. Niadtong tuig 2013, subli silang nagpakasal timaan sa ilang bug-os nga pagminahalay.
Buotang tawo
Samtang ang laing Sugbuanong miyembro sa SAF nga napatay mao si PO2 Wendel Candano, taga-Lawaan sa lungsod sa Dumanjug.
Kini gikompirmar sa ig-agaw niini nga si Meriam Llaño nga nakahinabi sa Banat News.
Matud ni Llaño nga daan na nga nagplano si Candano sa miaging tuig nga mouli aron pagtambong sa adlaw’ng natawhan sa iyang nag-inusarang anak niadtong Enero 24.
Dugang ni Llaño nga usa ka buotan, hilomon ug matinabangon nga tawo si Candano. Ang patay’ng lawas ni Candano maabot sa Mactan Airbase karong adlaw’ng Biyernes.
“Ang iyang asawa may moadto sa Manila, unya amo na lang sugaton dinhi,” sigon ni Llaño.
Si Dumanjug Mayor Nelson Garcia mipadayag sa iyang kasubo sa kamatayon ni Candano, siya nagkanayon nga mopadala ang lungsod og funeral car aron pagdala sa patay’ng lawas sa polis sa ilang lungsod.
Mopadala usab ang lungsod og coaster alang sa mga kabanay ni Candano nga mosugat sa Mactan. Isip pagpadayag sa kasubo, ipatuman sa lungsod sa Dumanjug ang half-mast flag sugod karong adlawa.
Nagbangutan
Isip pagbangutan ug pagsimpatiya, naka- half mast karon ang tanang bandila sa buhatan sa kapulisan ubos sa Police Regional Office-7.
Niadtong adlaw nga Lunes ang Officer In-Charge sa kapulisan lukop nasud nga si Director General Leonardo Espina mimando nga ipaubos ang Bandila sa Nasud sa tanan nilang buhatan. Gawas sa PNP, ang tanang kampo sa Armed Forces of the Philippines mibutang usab sa half-mast sa mga Bandila sa Nasud subay sa mando ni Chief of Staff General Gregorio Catapang Jr.
Samtang ang mga sakop sa kapolisan ilabi na ang mga alumni sa Philippine National Police Academy (PNPA) nagsuot og black arm bands isip simpatiya sa ilang mga kauban, apan boluntaryo lamang kini. – /EIM) (BANAT NEWS)