Kapitan George Rama mitaliwan na
CEBU, Philippines – Mitaliwan na si kapitan George Rama sa Barangay Basak San Nicolas Cebu City pasado alas-2 sa hapon kagahapon diha sa Chong Hua Hospital gumikan sa sakit nga Pneumonia.
Si George, 67, gi-admit sa tambalanan niadtong Enero 16 tungod kay di maayo ang gipaminaw niini sa panglawas ug nagsige og suka.
Tungod niini, wa siya makatambong sa kadaogan sa Lumad Basakanon nga milangkat sa Best in Street Dancing sa Sinulog.
Ikatulo na karon nga termino ni George isip kapitan. Si Norman Navarro, unang konsehal sa Barangay Basak San Nicolas maoy mohulip kaniya isip kapitan. Si Navarro mao usab ang choreographer sa Lumad Basakanon.
Sa wala pa mitaliwan si Kapitan Rama, si Mayor Michael Rama mipahibawo sa mga sakop sa media kagahapon nga “critical” na ang kondisyon sa iyang suod nga ig-agaw ug mihangyo nga i-ampo kini.
Human sa iyang pagbisita sa hospital, si Bise Mayor Edgardo Labella maoy mibutyag sa pagpanaw sa kapitan.
Matud ni Labella nga dako ang nahimong kontribusyon sa kapitan sa syudad sa Sugbo ilabi na sa iyang adbokasiya sa peace and order program nga nangamahan sa balaudnon sa massive clean-up human sa Sinulog. Si George kanhi konsehal sa siyudad sa Sugbo tuig 2001-2004.
“Even if he’s no longer around I think his legacy and memory will forever live in the minds and hearts of his constituents and the Cebuanos in general. He mobilize people to have a total clean-up and that’s will want never be forgotten,” saad ni Labella.
Sa iyang habig, si Atty. Reymelio Delute ang kontra sa politika ni George mi-ampo nga unta “magbaton og kalinaw ang kalag niya. I hope that his soul may rest in peace. Mapobre, madato ug politika mo-retire man g’yud ‘ta aning kinabuhia,” matud pa niini. – /EIM) (BANAT NEWS)
- Latest
