CEBU, Philippines - Ahente sa sigarilyo ang gitulis sa tulo ka mga armadong lalaki diha sa Barangay Dawis Sur sa Carmen.
Ang biktima naila nga si Rizaldee Gonzaga, 32, taga Lawaan, Talisay City. Base sa imbestigasyon sa kapolisan nga gi-park sa driver sa biktima ang delivery van nila aron maghatod og stocks sa tindahan.
Apan samtang nag-deliver sila kalit lang may miabot nga tulo ka lalaki nga nagsakay og motor ug gitionan siya og kalibre .38 nga revolver ug mimando paghatag sa halin niini.
Nadala g'yud sa mga tulisan ang P30 mil nga halin sa biktima ug ang cellphone niya nga nagkantidad og P2 mil.
Human niadto mipasirit og dagan ang mga tulisan ug dali sab nga mitaho ang biktima ngadto sa estasyon sa polis. Padayon pa ang imbestigasyon sa kapolisan aron maila ang mga tulisan.
Samtang dul-an P30 mil nga balor sa kabtangan nasakiyo gikan sa usa ka babaye nga gitulis sa wa pa mailhing lalaki samtang naglakaw kini sa dalan Sudlon-Fatima, Barangay Lahug syudad sa Sugbo.
Si Honeylet Avila Pelone, 24, molupyo sa Peacevalley, Barangay Lahug mitug-an sa kapolisan nga naglakaw siya sa maong dapit dihang kalit nga may lalaking mibutho sa iyang luyo nga nagdala og kutsilyo ug mideklarar og tulis dungan sa paglabni sa iyang bag.
Nakuha sa maong lalaki ang bag nga mobalor og P1,500, usa ka iPhone5 nga nagkantidad og P20,000, cash nga P6,500 lakip na ang school, company ug voter's I.D ug mga ATM card sa biktima.
Padayon pang gi-follow-up sa kapolisan ang maong insidente. (BANAT NEWS)