CEBU, Philippines - Ang lakang ni Cebu City Mayor Michael Rama nga ipasira ang South Road Properties (SRP) sa mga motorista gikan sa Talisay City gihulagway nga ilegal ug kalapasan sa balaod.
Si Rama mibahad sa pagpasira sa SRP human pipila ka mga opisyales sa Talisay City hugtanong misupak sa plano sa dakbayan sa Sugbo nga ilabay ang ilang basura sa Talisay City diha sa barangay Tapul Landfill.
Sumala pa nilang Cebu First District Rep. Gerald Anthony "Samsam" Gullas ug Talisay City Vice Mayor Romeo Villarante nga walay gahum ang mayor sa pagpasira sa SRP tungod kay ang presidente o ang kalihim lang sa public works and highways ang gihatagan og katungod niini.
"In my opinion, naa man sa Local Government Code nga maka-close og roads ang mayor, only temporary. One example would be fun runs. But the SRP is a national road, and it shouldn't be closed for the benefit of the public," matud pa ni Gullas.
Matud ni Villarante kung tinud-on ni Rama ang iyang bahad, daghan kining makontra dili lang sa Talisay apil na usab niini ang mga kalungsoran sa habagatang bahin sa Sugbo tungod kay alternatibo kining lutsanan padung sa amihanan.
"He is a lawyer and he knows that the SRP is a national road under the jurisdiction of the DPWH," matud pa ni Villarante, kinsa usa usab ka abogado.
Kahinumduman niadtong 2005, si kanhi Cebu City mayor Tomas Osmeña mipasira sa SRP aron makabalos ngadto sa Talisay City tungod sa isyu sa panag-ilog sa pipila ka luna niini. (BANAT NEWS)