CEBU, Philippines - Mohimo og linaing imbestigasyon ang Department of Health Central Visayas labot sa isyu sa usa ka inahan nga namatay sulod sa Mandaue City Hospital human giturukan og duha ka vial sa antibiotic.
Ang imbestigasyon himuon human nipadala og rekomendasyon ang Commission on Human Rights (CHR-7) ngadto sa DOH-7 alang sa pagsusi sa reklamo sa pamilyang Coliflores sa nahiaguman ni Jocelyn Coliflores niadtong Enero 2.
Matud ni Suzette Jabonette, Information officer sa DOH-7 nga giumol ang fact finding team alang niini mosusi sa tambalanan lakip na ang kapabilidad niini, mga gamit, facilities ug ang mga tawong gireklamo sa pamilya.
Ang pasyente sa wala pa namatay niawhag sa iyang 8- anyos nga anak sa pagkuha og video kaniya ug nibahad pagkiha sa doktor sa tungod sa iyang gipamati. Paglabay sa pipila ka minutos namatay kini.
Sa death certificate niini “probable rupture cerebral aneurysm” ang namatyan ni Jocelyn apan sa resulta sa autopsy sa PNP Medico Legal “sudden cardiac” ang hinungdan sa kamatayon ni Jocelyn. (Decemay P. Padilla/EIM)(BANAT NEWS)