Niihaw sa kolektor nadakpan

CEBU, Philippines - Wala naabti og 24-oras nasikop sa kapolisan sa lungsod sa Argao ang suspek sa linuog nga pagpatay sa babaye nga lending collector sa barangay Langtad sa nakalabay nga adlaw pinaagi sa pag-gulgol sa liog human gitulis.

Kini ang gitug-an ni Sr. Insp. Alejandro Batobalonos, hepe sa Argao Police, ug nangulo sa gihimo’ng hot pursuit operation sa pagsikop sa suspek nga si Rhine Jimenez, 28, nagpuyo sa maong lugar.

Matud ni Batobalonos nga ilang nasikop ang suspek sulod sa usa ka KTV Bar sa dakbayan sa Carcar kauban ang usa ka babaye nga nag-inom ug nag-videoke pasado alas 10 sa niaging gabii.

Nahimo’ng yawe sa kapolisan sa pagsikop sa suspek ang igsuon sa iyang ka live-in nga una’ng gi-imbestigar sa kapolisan human dunay nakakita nga kauban si Jimenez paingon lakaw sa Argao.

Gamit ang cellphone sa igsuon sa iyang asawa, ilang gipatawagan si Jimenez ug gipangutana kung asa nag-istambay apan igo lang niingon nga naa sa Carcar.

“Nagduda man gyud ko nga naa siya sa videoke-han kay saba man kaayo naa’y nagkantakanta, gilibot nalang namo tanan kuyog namo to’ng igsuon sa iyang live-in,” matud ni Batobalonos.

Nasakpan sa kapolisan ang suspek sulod sa usa ka lawak sa Secret Dreams KTV Bar sa Perelos, Carcar ug nisuway pa unta og lugnot si Jimenez. Giangkon sa suspek nga sabog siya sa drugas atol sa krimen ug natintal sa dala nga kwarta sa biktima. (Jojo C. Ugdol/GMR)(BANAT NEWS)