Mga polis sa PRO-7 didto sa Papal visit way reklamo
CEBU, Philippines - Sukwahi sa nahitabo sa ubang rehiyon nga nangreklamo ang mga polis nga wala nakadawat sa ilang mga meal allowance atol sa ilang pagbantay sa pagbisita sa Santo Papa, way ingon niini nga problema sa Police Regional Office-7.
Ang 400 ka mga sakop sa Regional Public Safety Battalion (RPSB-7) nga napulo ka adlaw nga nagbantay sa Tacloban City wala makasinati niini.
Si Philippine National Police, Officer-In-Charge, Deputy Director General Leonardo Espina mimando og imbestigasyon kalabot sa mga allowances sa mga polis nga wala pa mahatag.
Ang matag polis unta makadawat og P2, 400 nga allowance alang sa ilang serbisyo sa pagbantay sa Santo Papa gikan Enero 15 hangtod 19. Samtang kadtong napulo ka adlaw nagbantay P3,000 tungod kay P300 man ang allowance matag adlaw.
Ang hepe sa Police Regional Office-7, Chief Superintendent Prudencio Bañas miingon nga wala kini nadawat nga bisan usa ka reklamo sa tropa sa RPSB-7 nga gipadala sa Tacloban. Sumala pa ni Bañas nga ila g’yud nga gisiguro nga dunay saktong pagkaon ug gikinahanglan ang tanang mga gi-deploy sa Leyte.
Si RPSB-7 Battalion Commander, Supt. Clifford Gairanod miingon nga wa sila magkaproblema tungod kay mihatag man daan og P300 mil ang PRO-7 alang sa ilang pagkaon ug uban pa nga gamit.
Kadtong kuwang, ilaha unang gitaplan aron ini og abot sa meal allowance gikan sa Crame ulian nalang kini sa pundo.
Sigun pa ni Bañas nga gitug-an sab ni Regional Comptroller Division Chief, Sr. Supt. Edwin Paras nga nagpaabot na lang kini sa direktiba sa Campo Crame aron mahatag na nila ang P3,000 nga meal allowance sa mga polis.
“The funds are already here. We are just waiting for the fiscal directive,” dugang pa ni Bañas.(Jojo C. Ugdol/EIM)(BANAT NEWS)
- Latest
