Plite sa taksi ibalik sa P30

CEBU, Philippines - Niduso na kagahapong adlawa og rekomendasyon ang buhatan sa Land Transportation Franchising and Regulatory Board(LTFRB-7) sa fare reduction sa taxi dinhi sa rehiyon siete.

Unang niduso og petisyon ngadto sa kauluhan si Atty. Manuel Iway alang sa fare reduction sa tanang mga taxi sa tibuok nasud niadtong Disyembre 17 tungod sa rason nga sagunson na ang pagkunhod sa presyo sa petrolyo.

Sa petisyon ni Iway, gihangyo niini ang LTFRB nga gikan sa P40 nga flag down rate, ibalik kini sa kaniadto nga P30. Samtang gikan sa P3.50 kada dugang 300 metros himuon kining P2.50.

Gitug-an ni Rey Elnar, Officer-in-Charge sa LTFRB-7 nga atol sa public hearing , ang Metro Cebu Transport Operators Association (MCTOA) miinsister nga  mahal gihapon ang presyo sa spare parts.

Buot nila nga ibalik sa P30 ang flag down rate  apan ipabilin nga P3.50 gihapon ang mosunod nga 300 metros.

Way apil ang Yellow Taxi sa fare reduction ug magpabilin kini nga P70 tungod kay makapasakay lang kini og pasahero nga gikan sa airport.

Samtang gipahibawo ni Elnar nga kadtong mga PUJ driver nga wala gihapon mosanong sa minimum nga pletihan nga P7   mamahimo silang ireklamo sa LTFRB pinaagi sa pagkuha sa ilang plate number ug  isumbong sa hotline nga 231-6221.

Ang driver nga mapamatud-an nga wa nisukli sa insakto pahamtangan og penalty nga P5 mil.

Samtang giawhag na usab sa LTFRB-7 ang mga traffic enforcers sa pagsita sa mga PUJ drivers nga wala mokuha og certification alang sa pag-us-os sa pletihan.(Decemay P. Padilla/EIM)(BANAT NEWS)