CEBU, Philippines - Giawhag sa hunta probinsiyal sa Sugbo ang direktor sa Cebu Provincial Police Office, Sr. Supt. Noel Gillamac, nga paspasan ang pagsikop sa suspek sa pagpatay sa barangay kapitan sa Cambang-ug, Toledo.
Si Bokal Grecilda Sanchez niduso sa resolusyon nga nag-awhag kang Gillamac nga sikopon sa labing dali nga panahon si Dionesio Juarez kinsa suspek sa pagpusil-patay kang Timoteo Largo niadtong Enero 6, 2015.
Matud ni Sanchez nga ang pagsikop ni Juarez mahimong makatabang sa pagseguro sa kalinaw ug kahapsay sa komunidad ug ingon man sa pagseguro sa padayun nga pagsalig sa katawhan sa katakus sa kapolisan.
Ang suspek giingong nasuko ni Largo gumikan kay wa kini niya tugti nga moapil sa quarry nga gituohang gipanag-iya sa iyang pamilya hinungdan nga iyang gipusil sa makadaghang higayun si Largo gikan naghatod sa iyang mga bata sa eskwelahan nianang sayo sa buntag.
Si Juarez nagpabiling gawasnon hangtud karon sukad nahitabo ang krimen. (BANAT NEWS)