CEBU, Philippines - Kasong human trafficking ang ipasaka batok sa Danish ug gikatahapang bugaw nga babaye nga nadakpan sa ronda sa kapolisan sa gipuy-an nga apartment sa sitio Mansanitas, Tisa, dakbayan sa Sugbo.
Si Police Officer 1 Mar Villamonte sa Presinto 1 sa Mandaue City Police Office (MCPO) niingon nga si PO1 Jules Trogo sa women’s desk section ang nag-andam sa kaso.
Ang pasakaan sa maong kaso mao sila si Alona Tortosa, 34, nga taga sitio Orel, Banilad, dakbayan sa Mandaue ug Nicola Jacobsen, nga nag-abang og apartment sa Tisa, dakbayan sa Sugbo.
Ang magsuon nga 11 ug 12 anyos nga mga babaye ang niila kang Tortosa nga maoy nagkuha kanila sa dakbayan sa Mandaue ug gidala sa apartment nga gipuy-an sa langyaw.
Matud pa ni Villamonte nga ilang gitugyan sa Department of Social Welfare and Development-7 ang mga bata nga biktima sa pagpamugaw ni Tortosa.
Ang Regional Anti-Human Trafficking Task Force ug Women and Children’s Protection Desk (WCPD) sa MCPO ang nihimo sa pagronda sa apartment nga gipuy-an sa langyaw.
Gihimo ang pagronda human ang mga ginikanan sa mga biktima nangayo og panabang sa kapolisan dihang ang ilang duha ka anak nga mga babaye gibugawan ni Tortosa nga ilang silingan ngadto sa maong Danish. Gitug-an sa mga biktima sa kapolisan nga gipaila sila ni Tortosa ngadto sa langyaw niadto lang Disyembre. (BANAT NEWS)