CEBU, Philippines - Gihagit sa dakong opisyal sa Comelec ang mga batan-on nga mosalmot sila sa eleksyon pagpili og mga lider sa Sanguniang Kabataan (SK) ug ipakita nila nga dili training ground ang SK sa kurapsyon.
Si Comelec provincial supervisor Lionel Marco Castillano mihimo sa maong hagit sa mga batan-on samtang nagkaduol na ang eleksyon sa SK karong Pebrero 21.
Dunay daghan nga nangandoy nga unta mawagtang na ang SK kay gihulagway nga training ground lang kini sa kurapsyon, ilabi na nga mosalmot niini ang mga tang-an na nga politiko.
Si Castillano nagkanayon nga unta mabag-o na ang SK election tungod kay gikapoy na sila og pamati kabahin sa giingong dunay mga namayad nga kandidato sa SK.
“Ang among hagit sa Comelec is for you to prove that gusto ‘sab mo og reformation. Ipakita ninyo sa katawhan ug gobiyerno nga gusto mo ma-reform despite sa short nga period. Siguro sugdan nato sa pagpangampanya ninyo nga dili mo mogamit sa traditional nga paagi nga mamayad mo,” matud ni Castillano.
Dugang hagit ni Castillano nga unta ang mga SK dili mag-away atol sa eleksiyon ug dili mopahigayon og “dirty politics”.
Sagad g’yud nga sa bisperas sa eleksiyon ang ubang mga botante pakuyogon og “field trip” o ba kaha seminar sa usa ka resort aron dili sila makabotar ug ang kaatbang nga kandidato mapilde. (FREEMAN)