CEBU, Philippines – Gilungkab ang donation box sa Archdiocesan Shrine of St. John de Sahagun sa dakbayan sa Toledo.
Mitaho sa Toledo City Police Station si Lacambeni Zamora, sekretarya sa simbahan, nga napalgan na lang nga gilungkab ang ilang donation box. Base sa report nga nasigpatan sa usa ka sakristan ang usa ka menor de edad nga bata’ng babaye nga nimaneho sa pagligwat sa donation box.
Dihang nakabantay ang bata human gisita, dali kini nga nidagan.
Gibanabana nga ang nakuha kapin sa P1,000 nga donasyon.
Samtang nalipat ang usa ka tindera sa usa ka burger station sa barangay Sangi, dakbayan sa Toledo human nadagit sa kawatan ang halin.
Si Evangeline Ti-in, 36, taga barangay Poblacion sa maong dakbayan ang nitaho sa kapolisan.
Nibiya lang kadiyot ang tindera sa iyang gibantayan nga tindahan kay adunay gipalit ug nalimot pagsira sa pultahan.
Gituohan nga usa ka menor edad nga babaye ang dali nga nikuha sa halin sa maong burger station nga dili momenos sa P14 mil.
Matud sa tindera nga permanente nga mag-istambay ang maong bata sa burger station.
Gisuta sa kapolisan sa Toledo kung ang bata nga nanglungkab sa donation box sa simbahan sa Toledo ug ang nangawat sa burger station usa lang. – /GMR) (BANAT NEWS)