Sr. Santo Niño: Paglaum

CEBU, Philippines – Ang pagpaubos ug ang pagsunod sa mga hiyas sa Ginoo ang gihimug-atan sa wali ni Monsenyor Daniel Sanico atol sa farewell mass sa Saint Joseph National Shrine sa dakbayan sa Mandaue alas 4 kagahapon sa kaadlawon.

Si Sanico miingon nga si Senior Sto. Niño ang nahimong paglaum sa katawhan nga anak sa Dios apan gihubo niya ang iyang gahum ug nagpakatawo sa paghatag og paglaum sa mga kabus.

Naghatag og paglaum niadtong mga tawo nga sama kaniya nga nagpakatawo nag-antus usab ug gisakit nga maoy nahimong paglaum niadtong mga biktima sa katalagman sa bagyong Yolanda sa Tacloban, Leyte ug 7.2 magnitude nga linog sa Bohol.

Dugang pa niya nga ang pagsalig sa Ginoo maoy naghatag og paglaum sa kabus nga mga biktima sa linog nga bisan sa mga kasakit nga ilang nasinati apan wala kini makawagtang sa ilang pagsalig hinuon nakahatag kini kanila og dugang pa nga paglaum.

Gitambagan ni Sanico ang mga deboto ni Senior Sto. Niño sa pagsubay sa tulo ka paagi alang sa paghingpit sa gitinguha’ng paglaum nga mao ang pagsalikway sa mga sala sa kalibutan, pagsalig ug pagpaubos ug ang pagpakita sa timailhan sa gugma sa Dios.

Ang farewell mass gitambongan sa liboan ka mga deboto ni Senior Sto.  Niño nga mikuyog usab sa foot procession nga gihimo paingon sa Ouano Wharf alang sa fluvial parade.  (BANAT NEWS)