Panaad kang Senyor Sto.Niño

CEBU, Philippines - Sa atong kalisod kasagaran kanato mosangpit sa Kahitas-an aron mangayo og tabang nga mahaw-as sa kalisdanan nga gisagubang ug usahay, aron dunggon, dunay uban nga mohimo og mga panaad matag tuig.

Ang pagtubag sa ilang mga pag-ampo nga ilang giduyogan og panaad sama sa paghalad, giisip nila nga milagro. Ang kaparian di mokonsiderar niini nga milagro apan miawhag hinuon sa katawhan nga kinahanglang hugot ang pagtuo ngadto sa Kahitas-an.

Si Nanay Rosa “Rose” Rivera, 71-anyos nga taga Barangay Labangon, dakbayan sa Sugbo nga usa ka deboto ni Senyor Santo Niño mipaambit sa Banat News  kalabot sa grasyang ilang nadawat gikan sa Balaang Bata.

Matud ni Nanay Rose nga kanunay g’yud silang mosimba ug mosangpit kang Santo Niño kung duna siya’y pangayuon ug magpasalamat kung dunay mga grasyang maabot  kanila.

Daan na nga deboto si Nanay Rose sa Santo Niño apan niadtong tuig 1971  ug apil sa iyang panaad nga maghikay kanunay matag kapistahan sa Balaang Bata. Si Nanay Rose adunay duha ka anak nga sila si Welina, 48 ug Flora Mae, 45-anyos.  Si Welina kinsa usa ka nurse  ug naminyo na og langyaw ug atoa na magpuyo sa Amerika.

Samtang si Flora Mae kinsa duna nay lima ka anak ug ang bana atoa magtrabaho sa Saudi Arabia maoy kauban karon og puyo sa ilang balay ni Nanay Rose.  Si Flora Mae nagdumala na og kaugalingong manpower business.

Ang pagtinda-tinda og sari-sari ug ang pagpamuhi og baboy maoy panginabuhian nila ni Nanay Rosa ug sa iyang bana nga si Pedro kinsa mitaliwan na ngadto sa laing kalibutan niadtong 2007.

Niadtong tuig 1971, usa sa mga gibuhing baktin ni Nanay Rose ang nagluya  sud sa usa ka semana mao nga gianugonan kini kay maalkanse siya hinungdan nga misaad siya kang Senyor Sto. Niño nga kung maayo ang maong baboy ihawon niya kini atol sa iyang kapistahan.

Matud ni Nanay Rose nga pagsunod niya og bisita sa baktin nangangha siya tungod kay naulian kini ug dihang midako na gituman ni Nanay Rose ang iyang saad.

Apan human niadto wala na siya mosaad nga maghikay pa inig kapistahan sa Santo Niño.  Pagkasunod tuig duna usab siya’y buhing mga baktin nga pwerteng tamboka apan nahibulong siya tungod kay mikalit lang og kirig.

Gipahinumduman siya sa bana nga basin og nangayo na usab kaniya ang Senyor hinungdang misaad na usab siyang ihalad ang usa sa iyang mga binuhing baktin.

“Mihangyo ko kang Santo Niño nga ayohon ang akong mga baboy kay maghikay na usab ko atol sa iyang pista ug naulian man ang mga baboy nako… mao to’y akong unang milagro unya sukad ato nagsige na ko og hikay sa iyang pista kada tuig maggahin na g’yud ko og baboy nga akong ihawon para niya,” ni Nanay Rose pa.

Miabot ang pagsuway sa kinabuhi ni Nanay Rose dihang si Flora Mae na-diagnose nga dunay leukemia.

Magluhod ko maglakaw gikan sa pultahan didto sa Santo Niño hangtud sa altar diin akong gipangayo kang Santo Niño nga milagrohan ang akong anak,” subay ni Nanay Rose.

Niadtong higayona sige usab ang pagpatambal ni Flora Mae sa iyang sakit ug tuod man, pag-abot sa edad nga 16-anyos naayo si Flora Mae. Laing giangkon ni Nanay Rose nga milagro nga gihatag sa ilang pamilya mao ang kalamposan sa iyang anak nga si Welina nga kaniadto nurse sa usa ka sikat nga pribadong tambalanan sa dakbayan sa Sugbo nga pwerteng gamaya og sweldo.

Iyang giampo nga makalarga kini sa abroad, ug tuod man nakatrabaho sa usa ka tambalanan sa Middle East si Welina ug paglabay sa lima ka tuig, nadawat kini isip usa ka nurse sa London sa Englatera.

Gawas pa niana, natuman usab iyang pag-ampo nga maminyo na si Welina gumikan sa pangidaron niini ug tuod man nakabana kini og buotan nga Amerkano.

Dihay higayon nga upat ka tuig siyang wala motuman sa iyang panaad hinungdan nga giatake sa sakit iyang bana maong nangayo siya og pasaylo niini hangtud nga naulian. (EIM) (BANAT NEWS)