CEBU, Philippines - Gisikop sa Criminal Investigation and Detection Group-7 ang usa ka lalaki nga ilegal nga tighimo og armas sa barangay Suba, dakbayan sa Danao niadtong nakalabay nga hapon.
Ang dinakpan naila nga si Cirilo Cabasog, hingkod ug nagpuyo sa maong lugar.
Matud ni Supt. Fermin Armendarez, deputy chief sa CIDG-7, nga pasado alas 3 sa hapon dihang gisubay sa kapolisan ang maong lugar, ilang naaktohan si Cabasog nga naghimo og armas.
Nakuha sa mga awtoridad gikan ni Cabasog ang upat ka .45 caliber pistol, usa ka KG9 9mm sub-machine gun ug tulo ka magazine sa KG9.
Sumala pa ni Armendarez nga ang maong operasyon kabahin sa kampanya sa ilang buhatan sa pagsikop sa mga ilegal nga armas nga kadaghanan gikan sa dakbayan sa Danao. (BANAT NEWS)