Maayong pag-abot Pope Francis

CEBU, Philippines - Luwas nga miabot sa Pilipinas si Pope Francis kagahapon sa alas-5:31 sa hapon luwan sa Sri Lankan Airlines Airbus-340 Flight ALK-41411 gikan pa sa Colombo, Sri Lanka ug mitugpa sa Villamor Airbase.

Gisugat siya ni Pres. Benigno Aquino III uban sa dose ka mga sakop sa kabinete niini ug dose usab ka mga lider sa nagkadaiyang artsidiyosisis sa tibuok Pilipinas.

Sila Archbishop Giuseppe Pinto, apostolic nuncio kauban ni Chief of Presidential Protocol Anna Ferria  maoy unang misugat kaniya diha pa lang sa abyon diin gihimo ang pormal nga pag-imbitar kaniya ni Ferria sa pagkanaog samtang si Pinto maoy mi-escort kaniya pagkanaog sa tarmac.

Si Pope Francis nga labing unang Santo Papa nga dili gikan sa Uropa ug labing unang Santo Papa nga Hesuita mainitong gisugat sa liboan ka mga Filipino gikan pa lang sa Villamor Airbase hangtud na sa Apostolic Nunciature sa Taft Avenue diin siya magpundo sud sa upat ka Apostolic ug State visit dinhi sa nasud.

Sumala pa sa GMA News.Tv, si Francis miabot sa Pilipinas eksaktong alas 5:31 sa hapon ug gihimo ang protocol ceremonies ug military honors diha sa tarmac sa airbase.

Ang Santo Papa naila nga dili kaayo ganahan og mga pormalidad ilabi na sa mga protocol ceremonies sa mga lugar nga iyang bisitahon tungod kay mas ganahan siyang makigkulokabildo sa mga tawo nga nagpaabot kaniya.

 Duha ka mga bata ang bulahan nga misugat sa Santo Papa ug nitunol  og pungpong sa buwak nga mao sila si Lanie Ortillo,9, ug ang 10-anyos nga si Mark Angelo Balbero, pulos abandonadong mga bata tungod sa ilang kakabus ug nagpuyo na sa usa sa mga Don Bosco Centers.

Human niini, gikuyogan si Pope Francis ni Aquino padung sa nagpaabot niining Pope mobile nga dili bullet proof alang sa motorkada.

Alas 6:55 p.m. dihang naabot ang Papal convoy sa Taft Avenue diin nagdasok usab ang mga tawo nga nagpaabot aron kini personal nga makita bisan sa layo.

Karong adlawa gikatakdang makigkita kang Aquino sa Malacañang, moduaw sa Mall of Asia.

Sa unang tikang pa lang ni Pope Francis sa pultahan sa abyon, usa ka kusog nga hangin ang mipalupad sa iyang  zucchetto o tabon sa iyang hubon. Dunay umaabot nga bagyo nga gikatakdang mosud sa Eastern Visayas nga usa sa mga dapit duawon niini tungod sa mga survivors sa Yolanda.

Ang tigpamaba sa Vatican nga si Rev. Federico Lombardi  sa press conference kagabii miingon nga nakadayeg sila sa preparasyon sa Pilipinas.

Si Pope Francis maoy ikatulo nga Santo Papa nga miduaw sa Pilipinas, unang miduaw sa nasud si Pope John Paul VI niadtong 1970; sunod si Saint John Paul II niadtong 1981 ug 1995. (BANAT NEWS)