Handler sa mga “killers” nadakpan

CEBU, Philippines - Gitudlong maoy ‘handler’ sa mga guns for hire sa Barangay Inayawan, nasikop sa mga sakop sa City Intelligence Branch (CIB) sa Cebu City Police Office (CCPO) human naalarma nga nagdala og armas diha sa Upper Torre sa maong barangay.

Ang  nasikop naila nga si Samson Cecida, 40, nagpuyo sa maong lugar, ug apil sab sa nasikop si Johnrel Amistoso, 23, nga nakuhaan sab og armas ug drugas.

Matud pa ni Inspector Daniel Tarucan sa CIB sa pakighinabi sa Banat News nga dunay mitawag kanila kalabot sa usa ka armadong tawo nga nasigpatan sa maong lugar.

Sa pag-abot sa mga awtoridad, ilang nasigpatan si Cecida daplin sa kalsada nga dunay revolver nga misiwil sa iyang hawakan, pagkakita niini sa mga polis dali kini nga midagan  hinungdan nga gigukod hangtud sa balay niini.

Naabtan si Cecida ingon man ang usa sa mga suspetsado sa pagpatay ni Jayford Romanillos nga si Adoy Bas kinsa dali nga nakasibat.

Sulod sa balay ni Cecida nakuha sa kapulisan ang usa ka .357 revolver nga duna’y tulo ka bala, lakip na  drugas nga usa ka medium size ug walo ka gagmay nga pakete sa gituohang shabu.

 “Siya (Cecida) mao’y tighatag og bala, armas, nagsilbi ni siya nga tigbuhi sa mga killers,” matud pa ni Tarucan.

Nasayran nga duna pa’y laing kauban si Bas nga armado usab si Johnrel Amistoso nga ilaha usab nadakpan sa Saint Jude Acres sa barangay Bulacao , nakuha gikan ni Amistoso ang usa ka .38 revolver nga duna’y upat ka bala, ug upat ka pakete sa gituohang shabu.

Gitanggong na sa karsel sa Cebu City Police Office detention cell ang duha ka dinakpan, samtang padayon nga gipangita si Bas nga giingong kauban sa gitumbok nga mipusil patay kang Romanillos nga si Vince Winard Villareal nga una nang nadakpan sa kapolisan. (BANAT NEWS)