CEBU, Philippines - Patay ang usa ka lalaki nga gikatahapang nisakiyo sa mga butang sa mga tindahan sulod sa Insular Square Mall sa barangay Tabok, dakbayan sa Mandaue human napusilan sa mga guwardiya alas 4 ang takna niadtong Miyerkules sa kadlawon.
Si SPO2 Gregorio Cabizares sa Presinto 3 sa Mandaue City Police Office (MCPO) niila sa napusilan nga si Marvin Joseph Go, 31-anyos nga taga sitio Hilltop, Casili, lungsod sa Consolacion.
Ang duha ka guwardiya nga nakapusil mao sila si Reagan Tudlasan, 26, nga taga Hermag Village, Tabok ug Marciano Harolan, 40, nagpuyo gihapon sa maong dapit. Matud ni Cabizares nga namatikdan sa nagbantay nga mga guwardiya ang pagkaguba sa pultahan sa Dunkin’ Donuts sa mall.
Usa ka lalaki nga nagsakay og motorsiklo ang nipabulhot sa pagpadagan paingon sa gawas sa compound sa mall nga nagkarga og mga butang hinungdan nga gisita sa mga guwardiya. Apan nipabulhot gyud sa pagpadagan sa motorsiklo paingon sa gawas sa compound hinungdan nga si Tudlasan ug Harolan dali nga nisugat sa pagpusil ginamit ang ilang kargada nga kalibre .38 nga nakaingon sa pagkalamba sa motorsiklo dihang naigo ang tiyan sa suspek.
Dali nga nanawag sa buhatan sa Emergency Rescue Unit Foundation (ERUF) ang mga guwardiya sa mall nga maoy nagdala ngadto sa Mandaue City Hospital apan namatay kini sa paglabay sa pipila ka gutlo.
Nakuha kauban sa nalamba nga motorsiklo ang micro wave oven ug nagkadaiyang mga sapot nga ilang gituohan nga kinawat sa suspek sa mga boutique.
Temporaryo’ng gipaubos sa custodial investigation ang duha ka guwardiya alang sa dugang pa nga pakisusi nga himuon sa kapolisan. (BANAT NEWS)