CEBU, Philippines – Mokabat sa P400 mil ang gigahin sa Kapitolyo alang sa float sa Sinulog Grand Parade karong Domingo.
Ang float nga may tema nga “Bahay Kubo” magrepresentar sa rehabilitasyon sa mga nagusbat nga lugar sa probinsya sa bagyong Yolanda.
Matud ni Provincial Information Officer Ethel Natera nga ang tema nagpakita sa panaghiusa sa mga Sugbuanon ug sa Santo Papa taliwala sa mga katalagman.
Makita sa float ang hulagway ni Pope Francis nga mikaway ngadto sa katawhan gikan sa usa ka balkunahe ug sa likod sa Santo Papa mao ang replica ni Senyor Santo Niño nga nagtungtong sa kalibutan. Sa kilid sa float ang mapa sa Sugbo ug hulagway sa mga pagpaningkamot sa mga mitabang sa probinsiya aron sa pagtindog pagbalik.
Si Natera miasoy nga mas daku karon ang himuong float nga isakay sa usa ka 10-wheeler truck. Samtang wala pay kasegurohan kung may opisyal ba sa Kapitolyo ang mosakay sa float apan adunay mga ka batan-onan sa atubangan niini diin morepresentar sa mga lugar nga nabisitahan ni Pope Francis.
Ang taga Kapitolyo magsunod lang sa float atol sa grand parade apan adunay mga mosayaw isip presentasyon ug dili apil sa kompetisyon.
Kini ang ikaduhang tuig mga mosalmot ang Kapitolyo sa grand parade ubos sa administrasyon ni Gob. Hilario Davide III. – /GMR) (BANAT NEWS)