Cebu alternatibo’ng agian sa Santo Papa–DOTC

CEBU, Philippines – Gipangunayan ni Department of Transportations and Communication (DOTC) Secretary Jun Abaya ang paghimo og ocular inspection sa Mactan Cebu Internation Airport kagahapon sa buntag.

Uban ni Abaya si National Defense Secretary Voltaire Gazmin, AFP Central Command Chief Major General Nicanor Vivar ug lakip na ang kadagkuan sa MCIAA ug GMNR-Megawide Corporation.

Nagkanayon si Abaya usa ka major hub ang Cebu hinungdan ilang gisusi dili lang airport apan lakip na ang seaport aron malikayan ang mga kakulian atol na unya sa selebrasyon sa Sinulog lakip na usab ang mga kalihukan atol sa pagbisita ni Pope Francis sa Pilipinas.

Nasayran nga dunay mga espekulasyon nga basin og mohapit si Pope Francis dinhi sa Sugbo apan si Abaya miklaro nang daan nga wala sa itinenary sa Santo Papa ang Sugbo.

Apan ang Cebu maoy usa sa alternatibong adtoan ni Pope Francis kun dunay kakulian sa panahon.

Karong Huwebes, gibana-bana sa PAGASA nga mosulod sa Philippine Area of Responsobility ang Low Pressure Area.

Atol sa gihimong ocular inspection wala’y nakitang problema ang DOTC Secretary apan mimando kini sa security personnel nga doblehon ang ilang pagbantay.

Lakip na usab sa gihimug-atan niini mao ang ipatumang no fly zone sa  kaulohan, ug ang paghatag og notisya sa paglimita sa mga flight schedules sa gagmay'ng mga abyon sa mga flying schools. – /EIM) (BANAT NEWS)