CEBU, Philippines – Andam na ang Devotee City alang sa mga deboto ni Señor Santo Niño gikan sa gawas sa Sugbo nga mangabot karong Biyernes.
Gilauman nga mokabat sa tres mil ka deboto ang moabot sa Devotee City aron mopuyo atol sa kapistahan ni Señor Santo Niño
Si Konsehal Roberto Cabarubias nagkanayun nga siyento porsiyento na ang pagpangadam sa kagamhanan sa dakbayan sa Sugbo alang sa mga deboto nga magsingabot gikan sa mga probinsiya.
Adunay 120 ka container vans ang gipamutang sa Devotee City nga gikan sa 2GO Shipping Lines, duha ka telephone lines nga nahimutang sa opisina sa Devotee City nga gidonar gikan sa PLDT nga mamahimo nga gamiton sa mga deboto sa panahon nga aduna sila’y tawagan ug Free Wifi.
Ang Metropolitan Cebu Water District mohatag sa libre nga tubig mainom ug para kaligo, ang Visayan Electric Company maoy maghatag sa suga sa mga container vans, libre’ng kape gikan sa Kopiko ug uban pa nga mga business establishment ang mohatag og libre nga mga panginahanglan para sa mga deboto.
Samtang ang grupo sa Paramjit Singh kauban ang P.S Merchandise mohatag og pagkaon ug ilimnon sa mga deboto karong umaabot nga Domingo sugod alas 8 sa buntag hangtud alas 6 sa gabii.
Dugang pa ni Cabarubias nga bisan pa mo-minus ang moabot nga mga deboto dungan nga pag-abot sa Santo Papa andam na ang tanan.
Butangan og walo ka unipormadong kapolisan ang Devotee City aron pagseguro sa seguridad sa mga deboto ug may mga tanod gikan sa barangay Ermita, Santo Niño ug San Roque.
Awhag ni Cabarubias nga dili magdala og mga gipangdili sama sa mga talinis nga mga butang ug gidili sab ang pag-inom sa sulod.
Aron makarehistro sa Devotee City, kinahanglan nga makapresentar sa ilang mga ticket sa barko ug bus aron pagpamatuod nga gikan sila sa mga probinsiya.
Nabahin sa duha ka grupo ang pagpahiluna sa mga deboto nga gilahi ang mga lalaki ug babaye apan ang mga bata kuyog sa container van sa mga babaye. – /GMR) (BANAT NEWS)